Eila Andrea!
Eila Andrea!
Le parztit a lü,
l’ültim rapresentant
da quel bloch da ca’ dal la uègia cuntrada d’abriga,
da nö ilò nasüc’ e crisciüc’,
an ciam – la Pisciarota - da la funtana ca gh’era
an ghe ch’al tuleua l’acqua storichi famigli cuma:
i Gai u Murèc’, i Pretor,
i Treboc’ cun al Cuè e la Cia,
i Bindoc’, al Pinèli
e i Sciumunì cun l’Andrea che an quatar e quatr’ott,
al sa ne ‘ndac’ a lü.
Lo üdüt poch di fa`;
lü da là da la strada a poch pas da la so cà.
Al tiraua an po’ da strach, ma al uaua là.
“Eila Andrea” go ciama ià.
Eila; al modu da saludas da nö d’an tep:
“Eila” ca öl di’ tanti robi, cuma:
ciau, cuma uala, che piasè uedet e d’otar an-sèma.
Ina parola sola ca l’e stac a’ l’ültima, ch’an se scambiac sü sta tera.
An s’e crisüc’ an dal stès bloch da ca`.
Li nosi mami era cuma surèli,
sia an dal be che an dal mal.
L’Andrea al uà regurdat a par uès stac tra i prim,
che an dal dopu guera, pür cun sol la quinta elementare,
limit masim cunces a quii tep,
i se dac’ da fa a fa sü ca e ‘nvià lä al cumerciu,
tat da tirà fo la get da li stali e idac’ a’ la l’emigrazüu,
a dutà la ca’ da quel minim da cumudità indispensabil.
Ma tüt al finis.
Chisà sa l’à tentat da frenà al tep par met al pé sü al secul,
privilegiu da pöch e tra quii la so mama???
Ma quis-c’ ae cünc’ ch’an pö miga fa nö.
Nu al ma resta che di:
Eila Andrea!
Luisa Moraschinelli/Poschiavo 5/7/2012
|